|
|
系我大学同学度转载的-----------
To my next
始终唔明点解而家啲人嘅爱情可以搞到越嚟越复杂.唔明点解要咁多心计,唔明点解拍拖一定要一啖砂糖一啖屎先可以keep得耐.我知道人係唔容易满足嘅动物.但係我都相信,总有一个人会识得点去知足.所以我会对"你"好,比任何一个"你"以前嘅男友都要好.
或者我物质方面唔会好满足到"你",但係我一定会俾"你"我最好嘅嘢.不过,我会俾心机做嘢,揾多啲钱.因为我知道,而家哩个世界,冇钱真係唔得.你冇钱,人哋唔係睇你唔起,而係根本睇你唔到.
我唔中意玩咁多心计,我中意"你",只想一直同"你"痴埋一齐,做咩根本冇所谓,只要我哋喺一齐.唔怕你会见到我厌.因为如果"你"真係会厌我,咁或者"你"其实都唔係太爱我.
如果有啲嘢,"你"知道我唔想知,咁"你"可以唔同我讲.谎言,无论係善意或者恶意都好,我唔介意,只要"你"唔好俾我知.要呃我,请"你"呃我一世.因为我觉得,如果"你"肯花一生嘅时间嚟呃我,咁我都会乐意做哩个傻仔.
我会带"你"去做一啲,平时我中意自己一个去做嘅嘢,因为我想"你"清楚我究竟係一个点嘅人,如果"你"都会中意我中意嘅嘢,我当然更开心.我都会想"你"带我做"你"中意做嘅嘢,陪"你"行街,修甲,电眼睫毛,冇所谓,我坐喺旁边等"你"都可以自得其乐.
我从来都唔係一个想拍散拖嘅人,我中意得"你",就会想永远同"你"一齐.所以,如果当某日"你"突然发现自己已经唔再中意哩个冇任何优点嘅我."你"一定要记得坦白同我讲.唔需要任何借口,任何掩饰,直接讲就得.我接受得到.我中意"你",自然会尊重"你".只要"你"开心就得.因为如果"你'"同我一齐开心,点会离开我,既然唔开心,咁"你"可以走,我唔会怪"你"任何嘢.我只会觉得,係我唔够好,咁我唯有继续改进自己,继续揾下一个"你".但係佢绝对唔係代替"你".因为每个女仔都係独立嘅个体,我唔会将佢哋相提并论.
我开心唔开心咩都会讲"你"听,"你"唔好嫌弃我烦就得.
或者我有时唔可以随传随到,但係我玩嘅自由,有时唔需要太多,足够之后我好乐意分多啲时间嚟痴住"你".
或者我唔会成日都同"你"倾电话,因为我好容易冇嘢讲,但係希望你知道咁唔代表我对"你"冷漠.只係我嘅性格係咁.
或者我唔会同到"你"一世,但係我喺同"你"一齐嘅每一日都只有"你",只爱"你".
我当然唔会觉得"你"完美,但係"你"嘅缺点我会啃晒佢.当然,我都希望"你"对我一样.呵呵.
我会为"你"改变自己,"你"改唔改"你"自己嚟就我...多多益善,少少都无驱咁啦.
或者我而家冇钱,将来都继续冇钱.但係.我希望我买俾"你"嘅嘢,"你"会中意.因为"你"买咩俾我,我都会中意,都会带喺身边.
我病嗰时根本就係一个废人,所以我谂我会好体会到病人嘅心情,如果"你"病,我当然会喺"你"身边.不过可能帮唔到啲咩.
我当然唔会有乜嘢呃"你",所以我都希望"你"对我一样.记住喇,真係有日唔中意我,同我讲.
我记性好差,所以啲纪念日我要写低先记得,所以,最好唔好突然问我.只要喺到咗嗰日嘅时候,我会同"你"做啲嘢就得.
我当然想每晚都揽住"你"瞓,就算只手痹晒,都愿意继续俾"你"做枕头.不过要定时换下手咁咯.唔係就神经坏死.
当我同"你"一齐见到我嘅朋友嗰时,我一定会揽实"你"条腰同佢哋介绍,哩个係我女朋友.
我当然唔会将"你"同人哋比较,因为我好怕"你"会将我同人哋比较.己所不欲我唔会施于"你".
我其实唔会中意"你"化妆,因为会堵塞毛孔搞到皮肤差.不过如果"你"係都要化嘅话...我唯有努力揾钱买啲好啲嘅化妆品俾"你"咯...
我都唔会中意"你"着高踭鞋,唔係因为我中意女仔波鞋牛仔裤,而係因为咁样对"你"嘅身体唔好.要靓,有时都要要下命.
我咩都冇,我只爱"你".所以,"你"随时要有心理准备同我一齐挨驴仔.
某出电影里面有句对白.
哩个世界根本冇王子,只有PU街,同埋一啲扮王子嘅PU街.同样,哩个世界根本都冇公主,只有巫婆,同埋一啲自以为係公主嘅巫婆.
我知道我唔係王子,咁睇怕我都係一个PU街.所以,我都唔介意"你"係巫婆.
但係,只要我中意"你",我可以将"你"变成我嘅公主.
Cus,Love is everything.
咁,我嘅"你",又几时先会出现? |
|
发表于 2008-10-27 15:51:54
