琴晚,我約咗yao出嚟食飯.冇用乜嘢逼嘅手法.
我就話俾佢知,我唔會喊.只係想食餐飯
5點半佢下班,唔想佢等咁耐,我同boss講有事走先.
佢一直就好cool咁,唔主動同我講嘢,唯有我搵話題.感覺就好事擠牙膏.
我哋嚟到名典,坐翻以前坐嘅位置.
落車個時,佢先發覺本來佢車匙個個鑰匙扣上面個對筷子唔見咗一只,我都有一對咁嘅筷子,佢嘅係金色,我嘅係銀色.
佢依然掛住我同佢都有嘅個串玉.
我話幫佢拆咗剩低個只筷子,佢話唔使,由得佢.
我唔想喊,因爲我一喊,佢以後就唔會再見我,所以我就望住佢笑,佢居然問我係米傻咗,男人真係莫名其妙.
食飯個時,都係講D好無聊嘅嘢,工作啊,朋友啊,,,
6點半,食完,因爲個飯實在比以前差好多,我冇食幾多,我同佢講,去食鶏蛋仔,或者我係想佢睇到我以前寫嘅嘢,
其實我一直都想令佢改變依家嘅决定.但佢去到唔願同我一齊入去,因爲佢平時都唔會入去,見佢唔去,我都唔去囉,費事佢等...
佢問我係米翻屋企,我話去樵園坐下先.
跟住我哋去咗樵園,佢同我講,佢係衰人,叫我唔好對佢抱有任何希望,佢對我已經冇feel...
好多好多,佢甚至話:"信唔信我求其搵個人結婚啊啦"
我叫佢唔好,因爲我想佢搵個有錢嘅,對佢比我對佢更加好嘅人,咁我就甘心啦.
我問佢,以後會唔會同我齣街,佢話等我有男朋友先,佢話到時要我帶埋個男朋友出嚟同佢食飯,要係佢面前kiss.
我話:"你自己都唔中意係人面前咁做啦,點解要我咁做?"佢話:"我自己唔中意,但我中意睇人哋."我狂暈.佢永遠都係咁大男人.
之後傾咗好多無聊嘢,我話要我識咗男朋友先俾佢識女朋友,佢話可以,我話我結婚佢要去.佢應承.
我話我以後要生個仔,佢要生個女,我個仔要溝佢個女,仲要娶埋佢翻屋企,佢話我傻.
佢俾我講咗好多以後,將來,,,但佢唔俾我提以前,佢話過去就過去,唔好再提.
佢要我改口,唔可以叫佢做啊仔,我問佢咁我應該點叫,佢話叫yao哥,我跟住叫,佢背住我笑.我問佢我係米叫得好好笑,佢就一味笑.
跟住無無聊聊咁,一齊到八點幾九點,就送咗我翻屋企.
經過琴晚,心裏面好好多,或者我知道真係唔可以一齊啦,雖然佢唔俾我問原因,佢同我勾咗手指尾,以後係好朋友..
我同佢講,我知道冇可能,等我心情好D,我會有男朋友,我會正正經經搵人結婚,我唔怪佢,都唔會逼佢.
但佢就好似一直驚我會等佢,或者好似琴日回帖嘅人講,愛一個人,可以用其他方式.我睇開了,既然冇辦法,唯有咁.
如果咁佢好過,或者我都會好過,最少我哋可以係朋友,以後一樣可以見面,我哋唔會變成仇人.
愛以微笑開始,在親吻中成長,以眼泪結束,
雖然依家心仲好痛,但或者咁係對大家都好嘅做法,我投降了.
我會好好的,會變翻以前嘅自己,一樣咁開心,只係身邊冇咗佢,如果可以選擇性失憶,我想忘記呢段感情,但唔可以忘記佢... |
发表于 2009-3-23 13:48:52
